طريقة عمل بليله بلبلوكي وبالخل والكمون زينوكي بطريقة شهية ولذيذة
⠀⠀⠀⠀⠀⠀⠀⠀⠀⠀⠀⠀⠀⠀
المقادير :
كوبين حمص ( نص كيلو )
ملعقة صغيره بيكربونات الصوديوم
حبة بنجر ( شمندر )
٦ او ٧ حبات خيار
ملعقتين روح الخل ( الخل الاسود )
شطه / ملح / كمون / فلفل
⠀⠀⠀⠀⠀⠀⠀⠀⠀⠀⠀⠀⠀⠀
الطريقة :
ننقع الحمص لمدة ١٢ ساعه بمويه عاديه ونضيف عليها بيكربونات الصوديوم عشان يتضاعف حجمها اكثر ولو ماعندكم عادي
انقعوها بس بالمويه ونتركها مكشوفه بالمطبخ وكل ماشفنا مويتها صفرت نغير المويه بدون اضافة البيكربونات ، بعدين نسوي
المخلل اللي هو عبارة عن شمندر نغسله ونطبخه ، تقريباً بالقدر العادي ياخذ ساعه على مايستوي بس بقدر الضغط نص
ساعه او اقل ، هنا تلاحظو سويت حبتين شمندر انتو سوو وحده تكفي وكثرو من الخيار عشان مايطلع اللون مره احمر وتكون
درجة اللون حلوه ، بعد مايستوي الشمندر ويبرد نقشره ونقطعه مربعات صغيره ونقطع الخيار بنفس الطريقه ونضيف عليها
ملعقتين من روح الخل ( كل ملعقة خل نخففه بـ ١٠ ملاعق مويه ) وملعقتين ملح وملعقتين كمون وملعقه صغيره فلفل اسود
ونخلطهم مع بعض ونحطها بالبرطمان ونصب فوقها موية الشمندر مخلوطه بكوب مويه وندخلها الثلاجه لوقت التقديم ، بعد يوم
نغسل الحمص كويس ونحطه بقدر الضغط ونصب فوقه موية حاره الين مايغطي حبات الحمص وبدون مانحط ولا ذرة ملح واول
مايغلي نهدي ع النار ونتركه يطبخ تقريباً ٤٠ دقيقه ونشيك اذا الحبه صارت لينه وطريه نطفي عليها ونوزعها بالصحون ونحط
فوقها المخلل اللي سويناه وملح وكمون وشوية من روح الخل مخففه بمويه وشطه واستمتعو بألذ بليله مع الاجواء الشتويه ،
اصلاً الريحه لوحدها دمار
⠀⠀⠀⠀⠀⠀⠀⠀⠀⠀⠀⠀⠀⠀
ملاحظة : احتفظو بموية الحمص بالثلاجه
عشان لو زاد الحمص تقدرو تسخنوها وقت ماتحب
